BUTUAN CITY – Padayon karung gisuta ang katibuk-ang ihap sa mga nabiktima sa food poisoning sa Barangay Tandang Sora sa Esperanza Agusan del Sur kagahapon.
Sa gipagawas nga pamahayag ni Dr. Jacqueline Momville, Provincial Health Officer sa Agusan Del Sur Provincial Health Office nga bandang alas 6:00 sa sayung gabii nagsugod sa pag-abot sa Esperanza Medicare Community Hospital nga mga pasyente nga nakasinati og pagsuka-suka, kalibanga og pagsakit sa tiyan nga gikan sa Barangay Tandang Sora.
Misaka matud pa sa 72 ang pasyente nga ilang gitabang karun sa maong hospital og walay labot pa niini ang gidala ngadto sa ubang mga balay-tambalanan.
Sumala ni Dr. Momville nga padayon usab nga gi-assess nila ang mga pasyente kung duna bay e-refer sa mas dagkong ospital apan hinoon walay natalang namatay.
Giklaro usab sa doktora nga padayon ang ilang gihimong imbestigasyon sa insidente aron matumbok ang hinungdan sa pagdagsa sa mga pasyente.
Posible matud pa kining gikan sa pagkaon nga maoy unang gitaho sa mga residente nga nakadawat sila og pack lunch nga dunay sulod kan-on o rice, itlog ingon man atay sa manok o ba kaha sa ilang naimon.
