BUTUAN CITY – Nasikop subay sa managlahing operasyon ang duha ka indibidwal human nasakmit gikan kanila ang mga smuggled cigarettes nga gibana-banang mobalor og halos P3M didto sa mga probinsya sa Surigao del Sur ug Agusan del Sur kagahapon, Miyerkules, Abril 24.
Ang mga nakumpiskang mga illegal items mao ang 150 ka ream sa mga sigarilyong President, 50 ka ream sa Alpha Cigarettes, 428 ka ream sa Oakley Original, 287 ka ream sa Greenhill, 956 ka ream sa King Perfect, 350 ka ream sa Delta, 350 ka reams sa Broadpeak, 432 ka reams sa New Orleans; 1,407 ka reams sa Hero; 3,900 ka reams sa Soda, 25 ka reams sa Nelson ug 146 ka reams sa New Orleans Cigarettes nga ang tanan nagkantidad og P2,968,350.00.
Naila ang mga nadakpan nga sila alyas “Mal”, 60 anyos, sa Barangay Poblacion, Barobo Surigao del Sur, ug alyas “Pen”, sa Barangay San Isidro, Las Nieves, Agusan del Norte.
Gipahigayon ang hini-usang operasyon pinaagi sa Bureau of Internal Revenue-13, Regional Intelligence Division 13, Barobo Municipal Police Station, ug 401st Brigade Philippine Army.
Pasakaan ang duha og kasong paglapas sa RA No. 8424 o Tax Reform Act of 1997.
