BUTUAN CITY- Gipadayag ni Roselyn Gangca Exaure, tigpamaba sa Cabadbaran City Local Government Unit kon LGU, ang dakong pasalamat tungod sa malampusong payout nga gipahigayon sa National Government pinaagi sa Department of Social Welfare and Development (DSWD), diin halos 100% sa mga rehistradong tricycle drivers sa Dakbayan sa Cabadbaran ang naka-avail sa ayuda kagahapon.
Gihulagway usab niini nga nagmalipayon usab ang mga drayber sa maong kalamboan, bisan pa man adunay pipila ka isyu nga nasinati dili lamang sa Cabadbaran kondili usab sa ubang mga siyudad, sama sa mga pangalan nga anaa sa listahan apan wala marehistro, ug adunay mga rehistrado nga wala maapil sa listahan.
Gipasabot ni Exaure nga aduna usab dili kompleto ang nadawat tungod kay gamay ra nga porsyento ang naapil sa listahan.
Giklaro niini nga ang maong mga kakulian dili hinungdan sa lokal nga panggamhanan, kundili naggikan sa kakulangan sa datos nga nakuha sa National Government, bisan pa man nga ang LGU sa Cabadbaran nakatuman sa hustong pagsumite sa listahan sa mga benepisyaryo.
