-- ADVERTISEMENT --

BUTUAN CITY – Gidawat ni Philippine National Police (PNP) Chief Gen. Nicolas Torre III ang hagit ni acting Davao City Mayor Sebastian ‘Baste’ Duterte nga sinumbagay kansa iyang gihimo sa pinaka-ulahing episode sa iyang podcast niadtong Domingo.

Gipadayag ni Baste nga isog lang ang heneral kung naa sa posisyon dayong klaro nga kaya ra niya kini kung sila magsinumbagay.

Nag-ugat ang maong hagit kang Torre, tungod sa iyang pagpanguna sa pagpatuman sa arrest warrants batok sa iyang amahang si kanhi Pangulong Rodrigo Duterte niadtong Marso dihang kini pa ang direktor sa Criminal Investigation and Detection Group (CIDG).

Apan gitubag kini ni Torre kaganina kondiin iyang gibutyag nga kung seryoso si Baste, pwede kini mahimong charity boxing match aron makatigom og pondo alang sa mga biktima sa habagat ug mga pagbaha.

Dugang ni Torre, mahimo matud pa nila kining buhaton sa Araneta Coliseum karong Domingo ug sa kataw-anan nga tono, gisugyot pa niini nga si Manny Pacquiao ang mahimo unya nilang referee.

-- ADVERTISEMENT --