BUTUAN CITY – Nadakpan sa kapulisang nadestino sa police box sa may JC Aquino Avenue corner Montilla Bouevard, sa Brgy. Tandang Sora highway ning siyudad sa Butuan, ang usa ka gwardiya nga misulay pagtulis sa usa ka Travel and Tours Agency ug miluba-luba sa ticketing employee niini.
Naila ang nadakpan nga si RolandoMaamo Gerodico Jr., 51-anyos, lumad nga taga-Montalvan Burgos Brgy. 13 Cagayan de Oro, City ug kasamtangang nagpuyo sa T. Calo Ext. Brgy. Limaha ning siyudad.
Nasayran nga kaganinang alas-8:20 sa buntag, misulod matud pa ang supetsado sa : Travel and Tours Agency ug nagpaka-aron ingnong kostumer dayong deklara og hold-up ngadto sa biktimang si Gladys Roa Daigan, 40-anyos, minyo ug residente sa Employees Village, sa Brgy, Libertad ning siyudad.
Iya gilayon kining giluba sa pila ka higayon apan nakagawas ang biktima ug nakapangayo gilayon og tabang hinungdan nga daling girespondihan sa kapulisan ug nadakpan ang responsable kinsa nakuhaan og usa ka yunit sa .38 caliber revolver nga duna’y duha ka mga bala samtang padayon pang gipangita ang iyang gigamit pagluba sa biktima.
