BUTUAN CITY – Gibali sa Sandiganbayan ang hukom nga guilty nga gipakanaog sa lower court ning siyudad sa Butuan ngadto sa usa ka barangay kapitan kinsa nagtugot sa mga nadislokar nga pamilya nga temporaryong magtukod og kapuy-an sa usa ka luna nga gipanag-iyahan sa city government.
Madumdumang niadtong Enero 2023, gipagawas sa Butuan City Regional Trial Court nga si Kapitan Adela Butcon sa Brgy. Dankias, nakakomitar og graft dihang iyang gitugatan ang magti-ayong Carlos ug Marissa Alas uban sa laing pito pa ka mga pamilya nga temporaryong magpuyo sa usa ka bakanteng lote kansa unang gi-award sa city government ngadto sa ubang mga benepisyaryo.
Nakahukom usab ang korte ning siyudad nga pahamtangan si Butcon og unom ka tuig nga pagkabilanggo ingon man ug tibuok kinabuhing disqualification gikan sa pagserbisyo sa publiko.
Nag-ugat ang kaso dihang ang unang mga recipients sa lot award gikan sa city government nga mao ang magti-ayong Harold ug Ginalyn Otaza, nagbutyag nga gitugutan matud pa ni Butcon ang pagpapuyo sa magti-ayong Alas sa nasangpit nga lote tungod kay parente kini sa iyang bana.
Apan gitu-is kini nga desisyon sa Sandiganbayan First Division niadtong Hunyo 14 samtang gipadaplin una ang jail term sa rasong duna’y merito ang appeal tungod kay nadislokar man ang mga hingtungdang pamilya ug kinahanglan nila og mapuy-an gilayon kansa suportado sa usa ka council resolution gawas nga dili usab kini kremin.
Sa katapusan, gipadayag sa Sandiganbayan nga wala’y angayang ikasakit ang mga Otaza sa nadangatan sa lote tungod kay mga awardees pa sila niini ug dili pa mga tag-iya.
