BUTUAN CITY – Gireklamo dinhi ning sibyahan sa pipila ka mga mag-uuma ning siyudad sa Butuan ang dili organisadong paghatag sa City Agriculture’s Office sa ilang gi-claim nga abono subay sa mga discount vouchers nga gihatag sa maong buhatan ngadto sa tanang mag-uuma ning siyudad.
Sigon sa reklamanteng taga-Brgy. Dankias, unang gihimo ang distribusyon sa abuno sa Brgy. Lemon nga gitapuk-an sa mga mag-uuma gikan sa nagkada-iyang barangay ning siyudad.
Gikan matud pa sa paglista sa ilang pangalan ngadto na sa pag-claim sa discount vouchers hangtud na sa pag-claim sa abuno, nagsige lang sila og linya rason nga na-abtan sila og pila ka adlaw.
Tungod sa kataas sa linya, duna’y uban nga nakuyapan mugna sa grabeng ka-init sa panahon nga nakapadismaya kanila ilabina nga duna’y ubang claimants nga mga senior ciltizens na. Imbes computerize na matud pa ang gilhingusgan sa nasudnong kagamhanan, gitawag na hinuon niining binulok ang gihimo matud pa sa City Agriculture’s Office.
Samtang gipadayag usab ni Florencia Belos sa Brgy. Sumilijon, nagtuo siyang dali ra ang ilang pag-claim sama kaniadto nga gipaagi lang sa kada-barangay rason nga iya na lang matud pang gi-agwantahan ang paglinya.
Una siyang nakakuha og tulo ka sako apan mi-agi matud pa siyag kapasmo tungod sa dinutdutay sa resibo samtang gibalikan niya ang laing sako pagkasunod adlaw.
