BUTUAN CITY – Ang grupo matud pa nga Red Cobra sa bukirang bahin sa lungsod sa Santiago, Agusan del Norte ang responsable sa pagpusil-patay ni Datu Rusty Porogoy sa syudad sa Cabadbaran ning nakalabay’ng mga adlaw.
Sa pakighinabi ning sibyahan, gibutyag ni Ka Oto, nag-ilang tigpamaba sa Guerilla Front 16 sa NPA, nga subay sa ilang gihimong pagpanubay sa nasangpit nga insidente og base na usab sa testimonya sa mga nakasaksi ingon man sa mga narekober nga mga ebidensiya gikan sa crime scene.
Nasayran nga ang mga pag-umangkon matud pa ni Gorio Tagulaylay nga sila Marjun ug Jerome Tagulaylay ang responsable sa pagpusil-patay ni Datu Porogoy.
Si Gorio Tagulaylay maoy lider sa grupong Red Cobra, usa ka armadong grupo nga gi-armasan sa mga sundalo og nag-operate matud pa sa mga kabukirang bahin sa lungsod sa Santiago, Agusan del Norte.
Gigamit usab matud pa kini nga grupo sa pipila ka mga pulitiko sa maong lungsod ilabina panahon sa election.
Matud pa nga aduna’y bangi mahitungod sa claim sa yuta ang napatay nga si Datu Porogoy ug si Gorio Tagulaylay kansa maoy gilantaw karon nga anggulo sa maong kremin. (Mon Aplaya)
