BUTUAN CITY – Nagpahigayon og dakong march rally ang grupo sa mga mamumu-o didto sa kauluhang Manila dungan sa pagsaulog sa Adlaw sa mga Bayani kagahapong adlawa.
Sigon ni Ruel Duyag – tigpamaba sa Caraga All Workers Solidarity kon CAWS, gitawag ang maong kalihukan nga ‘Martsa ng mga Manggagawa’ diin lakip sa mga gising-git ang 750-pesos nga national minimum wage.
Sumala pa ni Duyag, kini nga suweldo ang nakita sa grupo nga makabuhi sa pamilya nga dunay lima ka miyembro.
Giklaro usab niini nga ubos kaayu ang suhulan sa Caraga Region nga kapin 320-pesos lang kansa dili igo kung ikumpara sa mga palaliton karon.
Lakip usab sa gisinggit atol sa maong martsa rally ang pagkondena sa grupo sa pag-veto ni Pangulong Rodrigo Duterte sa Security of Tenure Bill.
Sumala pa ni Duyag, hilabihan ang kadismaya ug kasuko sa mga mamumuo tungod kay padayon nga gisuportahan sa kasamtangang administrasyon ang contractual nga mga pagpanarbaho.
Alayon niini, nagduso ang Makabayan Bloc og tinood nga bersiyon sa security of tenure bill didto sa ubos balay-balauranan sa kongreso.
Apil usab sa gisinggit ang pagtangtang sa martial law declaration sa Mindanao pinaagi sa pagyagyag sa epekto niini sa plantasyon og minahan.
