BUTUAN CITY – Dunay tulo ka mga grounds nga gibarugan ang mga abogado sa Mindanao sa ilahang petisyon batok sa ika-upat nga impeachment complaint kang Vice President Sara Duterte.
Sayrang nagduso og petition for Certiorari and Prohibition ang mga abogado sa Mindanao karong adlawa, diin sumala ni Atty. James Reserva, usa matud pa sa ilahang legal grounds mao ang requirement of verification nga wala masunod sa mga kongresista. Pasabot sa abogado nga nakalatid matud pa sa Article XI, Section 3 sa 1987 Constitution nga kinahanglang verified una ang nasangpit nga complaint.
Dugang niini, wala matud pa naayo pag-verify sa mga membro sa ubos balay-balaoranan ang ikaupat nga impeachment complaint, rason nga nagtuo sila nga unconstitutional ang pagpa-impeach sa bise Presidente.
Ikaduha sa ilang gibarugan mao nga wala matud pa hatagi og due process ang pagpalagput kang VP Sara, ug ang ikatulo mao nga wala matud pa aksyoni sa mga kongresista ang unang tulo ka mga impeachment complaint ug wala usab nalakip sa order of business sulod sa 10 ka adlaw – kansa sukwahi sa nakalatid sa batakang balaod.
Subay ni Reserva nga daw gipondo ang unang tulo ka impeachment complaint ug gihulat an ika-upat, butang nga wala nahiuyon sa balaod.
Sa kasamtangan, naglaum nalang ang abogad nga dapigan sila sa Korte Suprema, ilabi na nga 32 milyones matud pa ka mga Pilipino ang ning botar sa nahisgutang bise Presidente.
