BUTUAN CITY – Nitaliwan na ang iladong local historian sa dakbayan sa Butuan nga si Gregorio Jose Palma Hontiveros o kon mas nailhan nga Greg Hontiveros, kanhi konsehal ning siyudad ug usa ka heritage advocate, historian, ug cultural preservationist nga gipahinungod ang iyang kinabuhi sa pagsaysay ug pag-amuma sa legasiya sa Butuan.
Ubay-ubay nga mga kalampusan ang iyang natampo nga nag-ila sa dakbayan sa Butuan dili lang sa tibuok Pilipinas apan apil na sa kalibutan. Nahimo siyang presidente sa Butuan Heritage Society, tungod sa iyang walay hunong nga paningkamot sa pagpreserba sa mga historikal nga dapit, pagpalambo sa kultural nga kahibalo, ug pagtipig sa mga lumadnong tradisyon nga padayong naghulma sa identity sa dakbayan.
Usa usab kini nga independent historical researcher ug manunulat kondiin nakahimo siya og duha ka libro nga ao ang ‘Butuan of a Thousand Years’ niadtong 2004 ug ‘A Fire on the Island’ niadtong 2008 gawas pa sa napublisar niyang Journal of History ug mga university journals.
Aktibo usab siya sa community journalism sulod sa daghang katuigan, ug nakiglambigit sa mga isyu sa social development, agrarian reform, ug katilingban.
Kapin sa duha ka dekada siyang aktibo sa mga isyu sa Butuan Heritage ug usa siya ka lifetime member sa Philippine National Historical Society (PNHS).
