BUTUAN CITY – Girekomenda sa mga membro sa Regional Task Force on COVID-19 atol sa ilang tigom nga ipa-ilalom sa granular lockdown ang mga barangay ning siyudad sa Butuan nga duna’y daghang aktibong kaso sa COVID-19.
Usa kini ka gamay nga klase sa lockdown kon pagsira sa usa ka partikular nga balay , compound o kaha sitio kansa ipatuman uban sa kapulisan, kasundaluhan og mga opisyal sa hingtungdang barangay.
Kini aron mapugngan na ang padayong pagkaylap sa makamatay nga coronavirus nga alarming na dinhi sa Caraga Region.
Sa pagkakaron, mapasalamaton ang lokal nga kagamhanan ning siyudad tungod sa tabang sa mga personahe PNP sa pag-monitor sa mga implementasyon sa health protocols pinaagi sa pagsubay sa kadalanan aron mabatukan ang pagkaylap sa COVID-19. Ang mga makit-ang molapas sa gipatumang mga health protocols dakpon.
Kagahapong adlawa lang, adunay kapin100 ang nadakpan ug gidala sa Sports Complex sa Brgy. Libertad kinsa nagsuroy-suroy nga walay suot nga face mask ug walay dalang quarantine pass.
Gi-isyuhan sila og notice of violation ug gipabayad og P1,000.00 sa City Treasurer’s Office.
Gi-orient usab sila ni Atty. Moshi Ariel Cahoy sa BPLD alayon sa ang ilang mga nalapas nga ordinansa ug gitudluan sila sa importansya sa Executive Order ug mga Ordinansa kalabot sa pagbatok sa pandemya.
