BUTUAN CITY– Patay ang usa ka grade 5 student sa Antongalon Elementary School ning syudad sa Butuan, human nga aksidente kining naduslakan sa iyang classmate og ballpen sa mata.
Ang biktima usa 13 anyos nga batang lalaki, Grade 5 student , ug nagpuyo sa Home for the Boys nga nahimutang sa may P4 Brgy Antongalon ning syudad sa Butuan. Samtang ang responsable usa ka 11 anyos nga batang lalaki , classmate biktima og residente usab sa naasoy nga Brgy. Sumala ni Jun Lantaca caretaker sa Antongalon Elementary School , nga iya nalang nadungog ang syagit sa mga estudyante sulod sa classroom ug didto iya nakita ang biktima nga nagkadugo na ang wala nga mata human aksidente naduslakan gamit ang ballpen.
Gilayon gidala ang biktima sa Butuan City Medical Center alang sa dinaliang medikasyon apan gi refer gilayon kini sa pribadong balay tambalanan ug nakutloan na kini sa hinolamang kinabuhi 4 ka adlaw gikan sa iyang pagka admit.
Sumala sa amahan sa responsable nga ang iyang anak og ang biktima nag away matud pa gumikan lang sa walay pagsinabatanay bahin sa pag dula og cellphone ug wala damha nga maduslakan kini sa iyang wala nga mata.
Giklaro ni Joseph Rosales amahan sa 11 anyos nga suspek nga dili intensyon sa bata nga tuslukon ang mata sa biktima kinsa nagtoo lang kini nga disgrasya ang maong panghitabo ug nangayo kini og pasaylo.
Sa pagkakaron anaa na sa kustodiya sa City Social Welfare and Development.
