BUTUAN CITY – Padayon karun ang imbestigasyon sa kapulisan ning siyudad sa Butuan alang sa posibleng pag-ila og pagkasikop sa mga suspetsadong miluba-patay sa minor-de-edad nga grade 11 student kagahapon sa alas 2:15 sa buntag sa may Purok-8, Tabuan Area, Barangay Obrero ning dakbayan.
Sa impormasyong nakuha gikan sa Butuan City Police Station-2, nagbaktas ang biktimang si Alyas Jojo, 16-anyos, Grade 11 sa Agusan National Highschool og residente sa maong dapit, kauban ang iyang barkada.
Hilabihan nalang ang ilang kakurat sa dihang dunay kalit nga mibutho nga grupo sa mga batan-on rason sa ilang pagpanagan.
Apan nadagma ang biktima hinungdang na-abtan siya sa maong grupo ug giluba siya sa usa sa mga niini.
Nakahiagum kini ug 2 ka samad linubaan sa likod ug usa sa dapi-dapi.
Gelayong nanibat ang maong grupo sa wala matinong direksiyun samtang ang biktima daling gidala sa pribadong ospital apan gideklara kining dead-on-arrival sa attending physician.
