BUTUAN CITY – Nagpagawas og pamahayag si Surigao Del Sur Governor Alexander ‘Ayec’ Pimentel nga nagkumpirmang nataptan siya og COVID-19.
Sumala sa gobernador, nakuha niya ang virus sa iyang trabaho dihang milibot siya sa kabarangayan aron lang ipasidaan nga misamot ang sitwasyon sa probinsiya tungod sa Covid-19 nga karon alarming na sa ilang probinsya lakip na ang paghatag og livelihood program ngadto sa mga Indigenous People kon IPs.
Pagbutyag pa sa opisyal, padayon ang iyang trabaho samtang naka-quarantine.
Ang gipasalamatan na lang niini nga wala natakdan ang iyang pamilya nga karun naka-isolate na usab isip preventive measure.
Nag-ampo usab kini sa Kahitas-an nga malugwayan pa ang kinabuhi aron maka-serbisyu pa sa mga Surigaonon.
Wala matago sa gobernador ang pagmahay tungod kay bisan pa man sa iyang mga paningkamot nga maprotektahan ang katawhan, duna gihapoy nagmagahe pagsunod sa mga health protocols ug apil sa iyang gikamahayan mao ang mga kritiko nga imbes nga mo-kooperar, magsige na lang og saway sa gihimo sa gobyerno.
Gibutyag usab ni Governor Pimentel nga critical na ang sitwasyun sa Surigao Del Sur tungod sa Covid-19 diin 18 na ang namatay nga suspect patient sa Adela Serra Ty Memorial Hospital.
Sa maong balay-tambalanan, miabot na sa 67 ang na-admit nga pasyente diin 16 ang positibo sa gihimong swab testing, 6 ang na-discharge apan dunay 3 ka mga bag-ong namatay lakip niini ang 3-anyos nga bata ug wala pay labot niini ang mga napatay sa ubang ospital nga wala na madala pa sa Adela Serra Ty Memorial Medical Center.
Mihangyu nalang ang gobernador og kooperasyon sa tanan ilabina sa gipagawas niyang executive order nga nag-require sa mga mugawas ug musulod sa mga siyudad sa Bislig og Tandag nga kinahanglang magpa-rapid test.
