BUTUAN CITY-Nabaligya sa subasta sa kantidad nga hapit US$2 milyon o kapin ₱117 milyon ang usa ka 18-carat Tiffany & Co. gold pocket watch nga gihatag isip pasalamat kang Arthur Rostron, ang kapitan sa RMS Carpathia nga nakaluwas sa kapin 700 ka survivors sa Titanic niadtong 1912. Nahimo kini karon nga pinakamahal nga Titanic memorabilia nga nabaligya sa usa ka auction.
Giregalo ang relo ni Madeleine Astor uban sa duha pa ka babayeng nakalahutay sa trahedya isip pagpasalamat sa kaisog ug dali nga aksyon ni Rostron sa pagresponde sa distress call sa Titanic.
Human madungog ang tawag sa tabang, gipadagan ni Rostron ang Carpathia ngadto sa delikadong dapit nga puno sa iceberg aron maluwas ang mga pasahero, bisan pa nga una nang nalunod ang Titanic sa ilang pag-abot.
Sumala sa Henry Aldridge and Son auction house, nagpakita ang taas nga presyo sa relo nga nagpabilin gihapon ang dakong interes sa publiko sa kasaysayan sa Titanic ug sa mga butang nga may dakong simbolikong bili.
