BUTUAN CITY – Gihulagway sa usa ka transport ning siyudad sa Butuan nga lamya kon luya ang gihimong pagmonitor sa mga gasolinahan ning panahona nga dunay krises sa gawas sa nasud nga dakong naka-apekto sa presyuhanay sa gasolina.
Sigon ni Ritchie Ravelo Presidente sa Federation of Eastern Suburb Four-Seater TODA nga kagahapong adlawa duna siya’y nakitang gasolinahan nga nagsirado tungod kay walay stock apan natingala nalang siya kay karung buntag ang nasangpit nga gasolinahan nag-abli na og duna nay stock apan ang presyo miusbaw na.
Sumala pa niini nga klaro kaayung hoarding na ang nahitabo.
Pagbutyag niini nga dapat paspas ang gihimong monitoring tungod kay sagad sa mga negosyante mga uportunista diin malipay kaayu kung dunay ingon ani nga krises tungod kay dako man ang ilang ginansiya.
Ang maong pamahayag ang misunod sa reaksiyon niini nga dili gyud maayu ang kahimtang karun sa presyo sa gasolina nga wala natagad pag-ayo sa gobyerno diin wala kini saktong plano bisan og nagsalig natang daan sa langyaw nga produkto.
Gipahayag usab ni Ravelo nga seguradong makapasamot sa ilang kalisud ang ipatuman nga 4 ka adlaw nalang ang trabaho sa gobyernong buhatan tungod kay makunhuran man ang mga pasahero sulod sa usa ka semana.
