BUTUAN CITY- Gipalgan ni Senador Christopher “Bong” Go ug kanhi Justice Secretary Vitaliano Aguirre II ang akusasyon sa International Criminal Court (ICC) kansa naglambigit kaniya isip co-perpetrator o kauban ni kanhi Presidente Rodrigo Duterte sa kasong crimes against humanity may kalabotan sa madugong war on drugs.
Sa iyang pamahayag niadtong Sabado, Pebrero 14, sigon ni Go nga karon ra siya nakahibalo sa mga alegasyon nga nakalatid sa redacted version sa Document Containing the Charges nga gipagawas sa ICC niadtong Pebrero 13.
Hugot usab nga gipanghimakak niini nga “walay basihan, bias, dili patas ug walay kalabotan” sa iyang papel isip Special Assistant ni Duterte gikan Hunyo 2016 hangtod Oktubre 2018 ug Executive Assistant sa Mayor sa Davao City gikan 1998 hangtod 2016. Gibutyag usab ni Go, nga wala siya’y kalabotan, kahibalo, o awtoridad sa maong mga alegasyon ug giingon nga sayop ang pag-angkon nga nagsilbi kini isip Chief of the Presidential Management Staff.
Samtang gitawag usab ni Aguiree nga “hilarious” ang mga akusayon ug giangkon nga wala kini kalabotan sa war on drugs, samtang si Senador Ronald “Bato” dela Rosa dugay nang wala magpakita sa publiko tungod sa mga taho nga posibleng ICC arrest warrant.
Samtang, gipahayag ni Senate President Pro Tempore Ping Lacson nga pagatuki-on sa Senado ang posibleng legal nga lakang aron matabangan sila Go ug Dela Rosa, ug giingon nga ang mga senador dapat hatagan og higayon nga magamit ang tanan nilang legal nga opsyon samtang girespeto gihapon ang proseso sa lokal nga korte.
