BUTUAN CITY – Wala nahisgutan ang padayon nga giyera sa Middle East sa nahimong pagpulong ni Pangulong Ferdinand “Bongbong” Marcos Jr. ug mga US Defense Officials nga gihimo sa New York, Amerika.
Sigon ni Palace Press Officer ug Presidential Communications Office (PCO) Undersecretary Claire Castro, nakatutuk ang tigum sa pagpakusog sa Philippines–United States Defense Partnership ug dili sa sitwasyon sa Middle East.
Sumala ni Castro nga lakip sa mga nahisgutan sa meeting ang mga nakatakdang Balikatan exercises tali sa militar sa Pilipinas ug Estados Unidos, lakip na ang padayon nga pagpatuman sa Mutual Defense Treaty sa duha ka nasud.
Sa pangutana kung dunay bag-ong commitment ang Estados Unidos pag-abot sa security support sa Pilipinas, gibutyag ni Castro nga nagpabilin ang saad sa Amerika nga ipadayon ug mas pakusgon ang defense partnership sa duha ka nasud sa ilalom sa nagtunhay nga kasabutan.
Wala nay gidugang pa nga detalye ang Malacañang kung duna pay ubang nahisgutan sa nasangpit nga panagpulong.
Sa pagbisita, nakigkita si Pangulong Marcos kang U.S. Undersecretary of Defense for Policy Eldridge Colby ug sa iyang delegasyon sa New York diin nahisgutan ang pagpakusog sa kapasidad sa duha ka nasud sa pag-atang sa mga hulga sa Indo-Pacific region, lakip na ang pagpa-ayo sa koordinasyon ug interoperability tali sa Armed Forces of the Philippines (AFP) ug militar sa Estados Unidos pinaagi sa hiniusang operasyon.
Subling gipalig-on sa duha ka panig ang ilang saad sa Mutual Defense Treaty ug ang padayon nga pagtinabangay aron mapabilin ang kalinaw og seguridad sa Indo-Pacific region.
