BUTUAN CITY – Dako ang tsan-sa nga sa dili madugay matapos na ang giyera sa Marawi City.
Kini ang gipadayag ni Joe Pantoa, Public Information Officer sa Iligan city Government sa eksklusibong pakighinabi ning sibyahan.
Sumala pa sa opisyal, gi-angkon sa Office of Security Defence nga anaa karun sa Marawi City nga dako ang tsan-sa nga matapos na kagubot tungod kay inanay mang na-ilog sa tropa sa gobyerno ang mga barangay sa maong siyudad diin karun muabot na sa 9 ang na-over run sa mga sundalo.
Padayun usab nga nakig-alayon ang lokal nga kagamhanan sa iligan sa Office of Security Defence diin naghulat lang ug senyales aron magpadala ug mga bus nga maoy magkuha sa mga na-trap nga sibilyan sa Marawi City.
Nasayrang muabot sa 14 ka mga bus ang gipagamit karun sa kompanya aron makapamakwit ang mga sibilyan ug malikay sa giyera tali sa gobyerno ug teroristang Maute Group.
Kagahapon lang, gibutyag ni Pantoa nga muabot sa 200 kapin ka mga bakwit ang miabot sa Iligan City ug sa kinatibuk-an, halos 44-mil na ang anaa karun sa maong siyudad.
Gani, fully book na ang mga hotels sa maong siyudad.
Sa pag-abot usab ni Department of Social Welfare and Development kon DSWD Sec. Judy Taguiwalo sa maong dakbayan, gikalipay niini ang maayong pagtratar sa lokal nga kagamhanan sa Iligan City sa tanang mga bakwit. (Rolan Janea)
