BUTUAN CITY – Hugtanong gipanghimakak sa usa ka delivery rider nga iya ang nakuhang mga gitoohang ilegal nga drugas nga gipalaman sa atsal, sa pagkaong gihatud sa Butuan City Jail nga nahimutang sa Barangay Libertad ning siyudad sa Butuan kaganinang alas 3:00 sa hapon.
Sumala pa sa delivery rider nga si Welbert Ejosa Elardo, 27-anyos, dunay live-in partner nga nanimuyo sa Purok-3, Barangay Port Poyohon ning dakbayan, nga igo lang siya nagdeliver sa maong order nga pagkaon.
Gi-order matud pa kini gikan sa delivery apps sa pangalang Aireen X4 diin gipahatag kini ngadto sa usa ka Dave Pasaol, base sa nakabutang nga pangalan sa bag. Apan ang nakapait kay dili na makontak pa ang nag-order niini.
Nasayran nga sa dihang gisusi ang maong dala sa delivery rider pinaagi ni Jail Officer 2 Louie Cane, dunay namatikdan kining kadudahan rason usab nga nanawag og ginsakupan sa Butuan City Police Station-3 alang sa himoong search sa bag nga dunay sulod nga karne og mga lamas.
Dinhe nadiskubrihan ang unom ka mga dagkong sachet sa gitoohang shabu nga gisulod sa atsal.
Sa karun, gikustudiya na sa Butuan City Police Station-3 ang suspetsado alang sa tukmang disposasyon.
