Gitoohang pagpanghostage sa Surigao City, misangpot sa kamatayon sa suspetsado, kapulisan naglibog pa sa tinood nga panghitabo

BUTUAN CITY – Padayon karung gipanubayan sa kapulisan ang gitoohang pagpang-hostage nga mikalas sa kinabuhi sa usa ka suspetsado kagahapon sa alas 12:00 sa udtu sa Barangay Washington, Surigao City.

Base sa pakighinabi ning sibyahan kang Police Executive Master Seargent Jeanil Saraus, Freedom of Information Incharge sa Surigao City Police Station, alas 12:40 sa udtu sa dihang nakadawat sila’g taho sa gi-alegahang hostage taking sa 4^th floor, ASY Building, Kaimo Street, sa Barangay Washington, nga dali usab nilang girespondihan.

 Pag-abot sa kapulisan sa maong lugar, nadala na sa Surigao Medical Center ang duha ka mga biktima nga sila Victoria Cai Ke, 18-anyos og 12-anyos nga babaye nga pulos dunay mga samad.

Na-abtan sa kapulisan ang nagkadugo nga lalaki nga anaa sa salog og gitoohang mao ang suspek kansa dunay pinusilan sa ulo nga gidala sa ospital.

Naila kining si Lojie Dave Esteban Tadlas, 32-anyos, olitawo,Security guard, residente sa Riverside Kaskag, Brgy Washington, Surigao City apan nitibong taga Barangay Tag abaca, Basilisa, Dinagat Island. Gidala kini sa ospital apan nakabsan sa kinabuhi pasado alas 3:50 sa hapon base sa attending physician nga si Dr. John D. Bartolome. 

Nasutang duna pay usa usab ka 16-anyos nga lalaki nga anaa sa kwarto nga dunay samad usab rasong gidala sa Caraga Regional Hospital. Sa inisyal nga imbestigasyon, nagtan-aw og TV ang mga biktima sa dihang dunay nanuktok nga pagtoo nilang ang ilang amahan.

Apan sa pag-abli nakita ang suspek nga dunay dalang ball hammer kon martilyo og gi-atake ang mga biktima hangtud nga nakatawag og tabang.

Sumala pa ni Police Executive Master Seargent Jeanil Saraus nga hinabion pa ang mga biktima aron masuta ang nahitabo ilabina kay ang suspek nakabaton og pinusilan sa ulo.

Samtang giturn-over usab sa amahan sa mga biktima nga si Je Shi Ke ang usa ka 9mm nga pistola nga dunay 7 ka mga buhing bala nga nakuha didto matud pa sa tiilan sa suspetsado.

Narekober usab sa lugar ang usa ka basyu sa 9mm nga bala, ang ball hammer og cellphone. Sa karun, padayong pang gi-establisar kinatibuk-ang panghitabo aron masuta ang motibo sa suspetsado. Nakahaya na ang patay’ng lawas sa suspetsado sa punerarya sa KM-3, Barangay Luna, Surigao City.