BUTUAN CITY – Padayon ang imbestigasyon sa kapulisan sa pagpusil kang Dr. Frederick Padilla – surgeon sa Butuan Medical Center kagahapon sa buntag samtang anaa kini sa parking lot sa maong ospital.
Sigon ni P/Sr. Supt. Albert Magno – director sa Butuan City Police Office, lakip sa anggulong ilang gitutukan ang kanhi kasong gilambigitan niini.
Hinuon, wala pa nila ma-istorya ang biktima alang sa pagpalawom pa sa ilang imbestigasyon sa ingon makakuha sila og lead sa nasangpit nga panghitabo.
Aminado ang opisyal nga makonsidera gihapong high value target ang biktima tungod kay apil pa gihapon kini sa drugs watchlist.
Nasayrang anaa na sa luwas nga kahimtang ang biktima human nakuha gikan sa iyang tiyan ang bala human ang operasyon kagahapon.
Mahinumdumang nadakpan na kaniadto ang maong doktor sa gilusad nga buy bust operation sa Butuan City Police Office batuk sa target sa maong operasyon nga si Jefrix Galon alias “Jepoy.”
Nakuha gikan kang Jepoy ang walo ka mga sachets sa suspected shabu, buy-bust money, og cash nga kapin sa 5-mil pesos apil na ang mga drug paraphernalia.
Nagnegatibo usab sa drug test ang doktor hinungdan nga gibuhian gilayon siya. (Beth Ruiz)
