BUTUAN CITY – Pasakaan og kasong murder sa Police Regional Office kon PRO-13 ang walo ka mga rebeldeng New People’s Army kon NPA tungod sa ilang pagpusil-patay kang Police Executive Master Sergeant Jimmer Omisol.
Kini human gi-angkon ni Ka Omar Ibarra, nagpa-ilang tigpamaba sa NPA-Western Agusan del Norte-Agusan del Sur kon NPA-WANAS sub-regional command, nga ang ilang tropa sa North Central Mindanao Region ang gitahasan aron unta dis-armahan lang og pakig-sitoryahan si Omisol nga miresulta sa pagpatay niini.
Sa eksklusibong pakighinabi sa Bombo Radyo Butuan, gipadayag ni LtCol. Christian Rafols – information officer sa PRO-13, nga nagpa-abot na sa iyang pahasubo ngadto sa pamilya Omisol si director Brigadier General Gilberto DC Cruz tungod sa maong hitabo.
Sigon niini, apil sa ilang gipa-abtan og pahasubo ang Carmen Municipal Police Station diin nadestino si Omisol isip Municipal Executive Special Police Officer kon MESPO tungod kay usa matud pa kini ka haligi sa maong istasyon.
Sa eksklusibong pakighinabi ning sibyahan, gipadayag sa opisyal nga gi-ilang bayaning pulis si Omisol tungod sa gugma niini sa iyang trabaho alang sa paghatag og proteksyon sa katawhan nga maoy iyang gipanumpaan og sukwahi sa alegasyon sa mga rebeldeng New People’s Army nga usa matud pa kini ka abusadong pulis.
Gidugang ni Rafols, nga kini matud pa ang hinungdan nga nagsubo ang tibuok rehiyon sa pagkamatay niini dayong kondena sa walhong grupo sa pataka matud pa nila paglikida og pulis nga wala man lang mihimo og makuting imbestigasyon aron unta masuta kung unsa ang nahatag niining tabang ngadto sa iyang kabanay ilabina niadtong nagsalig og naghangad kaniya.
