BUTUAN CITY – Makig-alayon sa kapulisan ning siyudad sa uban pang mga law enforcement agencies ang Butuan City Permits and Licensing Division sa City Hall aron ma-aksyunan ang padayong pag-operate sa gipasirad-an na nilang buhatan sa Kabus Padatoon kon KAPA Community Ministry International Inc., ubos sa bag-ong pangalang Special Distribution and Trading Corporation.
Giklaro ni Atty. Moshie Ariel Cahoy, legal officer sa maong buhatan, sa ilang gi-serve nga cease and desist order wala kini magpasabot nga ang opisina lang sa maong negosyo ang ilang gipasira kondili ang mismong business operation.
Kini ilabina nga wala kini tuguti nga mulambigit sa investment scheme sa rasong ang nature sa ilang gi-aplayang business permit alang man sa ilang negosyong pagpamaligya og mga construction supplies.
Dugang ni Atty.Cahoy, gilapas sa kadumalahan sa maong negosyo diha sa Lower Mandacpan Brgy. San Vicente ang una na nilang gipatumang kamanduan human nakigtransaksyon sa ilang mga kliyente diha sa gawas nga bahin sa gipasirang establisamiento.
Samtang giklaro sa opisyal nga sa ilang pagberepika, wala sila’y nakuhang lig-ong ebidensya nga ang nasangpit nga negosyo mao ang KAPA kaniadto.
Hinuon, duna’y ilang nahinabi nga tawong anaa sa maong besinidad kinsa mi-angkong mao kini ang KAPA.
Mahinumdumang gipasira nila ang maong establisamiento tungod sa pag-operate na niini taliwa nga wala pa’y gi-isyu kanilang business permit.
Gawas pa, nasuta pa nga wala’y mga construction materials sa ilang business premises nga maoy ilang negosyo hinuon nangdawat sila og kwarta nga pay-in sa ilang mga membro ug mihimo usab og mga payout transactions.
