BUTUAN CITY – Naka-abot na ang napalit sa Butuan City Government nga dugang mga personal protective equipments kon PPEs ug mga ventilators isip kabahin sa estratihikong lakang aron ma-contain ang pagkaylap sa COVID-19.
Gitaho sa City Procurement’s Office nga apil sa mga nangabot ang 10-mil ka non-medical suits, 4,000 ka mga medical suits, 10,000 ka mga goggles, 75,000 ka mga N95 masks, 500,000 ka mga standard face masks, 75 ka mga non-invasive ventilators, ug 5 ka mga invasive ventilators.
Ang mga PPEs ug equipment gidala gikan sa Manila padulong sa Butuan City pinaagi sa C130 ug C295 planes ug cargo trucks.
Bag-uhay lang dihang gibutyag ni Mayor Ronnie Vicente Lagnada nga gipaningkamutan sa iyang kagamhanan nga makabaton og PCR laboratory para sa Butuan City ug rehiyon sa Caraga.
Nasayrang ang siyudad ang pinaka-una sa rehiyon nga nakahimo og rapid testing, human nakapalit ang LGU og 2,000 ka mga rapid antibody test kits gikan sa China plus dugang 50,000 ka mga test kits.
Sa pagkakaron, operational na ang COVID-19 centers alang sa asymptomatic cases, sama sa 24-bed capacity center sa Baan Km 3, ug Butuan Medical Center alang sa severe cases nga duna’y 48-bed capacity. .
