BUTUAN CITY – Tumang kasubo ang gibati karon sa mga ginikanan sa 43-anyos nga si Engr. Edwin Petilla, taga-Brgy. Talogtog, lungsod sa Mangaldan, Pangasinan human naka-abot kanila ang balita nga apil ang ilang anak sa mga namatay sa nasunog nga residential building sa Mangaf area sa Kuwait.
Sa eksklusibong pakighinabi sa Bombo Radyo Dagupan, gibutyag sa mga ginikanan sa biktima nga sila Rebecca ug Juanito Petilla, nga katapusan nilang naka-istorya ang ilang anak niadtong Hunyo 7 apan wala sa ilang huna-huna nga mao na diay kadto ang ilang katapusang panag-istorya.
Gipadayag pa sa amahan sa biktima nga kung hatagan lang siya og higayong makapili, mas pilion niyang siya na lang ang mawala ning kalibutana tungod kay daghan pa og matabang ang iyang anak ngadto sa ilang pamilya.
Igo na lang sila sa pagdanguyngoy sa pagkawala sa ilang anak tungod kay buutan matud pa kini, manggihuna-hunaon ug wala’y bisyo.
