BUTUAN CITY – Mi-apela ang Gigaquit COVID-19 Task Force sa lungsod sa Gigaquit, Surigao del Norte ngadto sa Department of Health kon DOH-Caraga nga ihunong na ang pag-tag sa usa ka bag-ong kaso COVID-19 nga taga-Gigaquit.
Sa gipagawas nga advisory sa task force, giklaro niining usa ka 32-anyos nga babayeng Returning Overseas Filipino kon ROF nga gikan sa Dubai ang maong kaso nga residente sa maong lungsod kinsa asymptomatic ug anaa sa istriktong quarantine facility sa Manila.
Sumala pa sa Task Force, wala pa makatunob sa ilang lungsod o bisan asang lugar sa Caraga Region ang maong ROF sa nakalbay’ng unom ka mga buwan.
Tungod sa maong kaso, kini na ang ika-unom nga kumpirmadong kaso sa Gigaquit apan wala’y bisan usa sa mga niini ang nagpuyo sa maong lungsod sa panahong gitaho nga positibo sila sa coronavirus.
Hangtud usab sa pagkutlo niini nga balita, wala pa’y ebidensya nga duna’y local transmission sa maong lungsod rason nga nagpabilin gihapon silang COVID-19 free.
Aron malikayan ang pagbaton og kaso sa maong lungsod, nanawagan ang task force ngadto sa tanan nilang mga residente nga sundon gihapon ang standard precation higayong mugawas sa ilang panimalay sama sa pagsuot og face mask, pagdistansya og usa ka metro gikan sa laing mga tawo, kanunay nga paghugas sa mga kamot, pagkaon sa balanse nga dyieta uban sa mga prutas ug gulay ingon man pagkatulog og dili mu-ubos sa walo ka oras ug magpakunsulta gilayon sa Rural Health Unit kung duna’y dili maayong gibati sa lawas.
