BUTUAN CITY – Human ang pito ka oras nga interogasyon og pagpa-ilalom sa proseso sa background check sa kapulisan sa Surigao City, hingpit nang gibuhian ang una nang gidudahang membro sa teroristang grupong Maute kinsa nadakan sa pantalan sa maong siyudad.
Una nang gikumpirma ni Major Eugenio Liras sa Philippine Ports Authority-Surigao City nga duna sila’y nadakpang gidudahang membro sa teroristang grupong Maute pasado alas-8:50 sa buntag sa pantalan sa Surigao City.
Sa eksklusibong pakighinabi ning sibyahan, gipadayag sa opisyal nga sakay sa PP bus ang nag-inusarang suspek mga si Abdul Aziz Umpara, 50-anyos kinsa misulay pagsulod sa pantalan gikan sa Cagayan de Oro City og padulong matud pa sa pantalan sa Liloan, Southern Leyte.
Sa ilang pagpakighinabi ngadto sa suspek nasayran nga gikan pa kini sa Lanao del Sur og milukat og cedula niadto pang Hunyo uno.
Iyang gipasabot nga mandato kanila gikan sa Malakanyang nga dili tugutang makasakay og sakyanang pandagat sama sa barko ang mga indibidwal nga wala’y mapakitang balidong ID.
Dihang ila matud pang gi-match ang hulagway niini ngadto sa hulagway sa mga membro sa Maute, susama kini sa anaa sa ilang listahan sa mga wanted nga Maute members nga si alyas Hasib.
Gibuhian si Umpara human napruybahan nga dili kini membro sa Maute group. (Beth Ruiz)
