BUTUAN CITY – Padayong gipanubayan sa Butuan City Police Office kon BCPO ang tag-iya sa power bank nga gisulod og box ug na-alaang bomba kansa napalgan sa entradang bahin sa St. Joseph Cathedral kaganinang alas-siete sa buntag rason nga nadudahang bomba ug hinungdan sa bomb scare.
Sigon ni BCPO spokesperson PLt. Crispulo Alburo, kagahapon pa nabantayan ang maong box kilid sa simbahan nga gisaksak pa sa saksakanan sa kuryente. Kaganinang buntag, napalgan kini sa tinghinluay sa simbahan sa entrada na nga bahin sa simbahan ug dihang gitan-aw sa gwardiya, nakita niini ang cord ingon man numero nga ulahi nang nasayran nga alang sa battery percentage ug ang cord, alang sa charger niini.
Dali kining gi-report sa Butuan City Police Station-1 rason nga daling gipadala ang mga sakop sa City Explosives and Canine Unit kon CECU ug gihimo gilayon ang pag-x-ray sa butang nga gisundan gilayon sa pagpabuto niini.
Bisan pa man sa maong bomb scare, gipasalig sa opisyal nga wala’y angayang kabalak-an ang katawhan ilabina kadtong mga manimbahay sa Simbang Gabi ug Misa de Gallo tungod kay luwas matud pa ang siyudad ning panahon sa Pasko.
Gipasalamatan usab niini ang mga nagpakabanang indibidwal alang sa siguradong kaluwasan sa katawhan ning siyudad. Gi-awhag usab niini ang uban nga susama ang buhaton higayong duna’y mamatikdang kadudahang butang.
