BUTUAN CITY – Misangpot na hinuon sa kahimuot ang kakulba nga unang gibati sa mga tawo kinsa na-alarma dihang napalgan ang usa ka bag nga gibilin matud pa sa usa ka nakamotorsiklong lalaki kaganinang buntag sa may Pili Drive Extension, JC Aquino corner Ochoa Avenues ning siyudad sa Butuan.
Usa ka room boy sa usa ka hotel ang nakamatikod sa pagbilin sa maong bag hinungdan nga dali nila kining gitaho sa Butuan City Police Station 1.
Mimugna pa og kabalda sa dagan sa trapiko ang maong hitabo human gi-cordon sa mga pulis ang maong dalan aron masegurong wala’y ma-angin higayong ma-detonate na ang gitu-uhang bomba nga sulod niini.
Sa pagresponde sa mga sakop sa Explosives Ordinance Disposal kon EOD Team og sa SWAT Team uban sa ilang K-9 dog, dinhi nasuta nga bawon ang sulod sa bag.
Apil dinhi ang sud-an nga adobo nga posibleng maoy balik-balik nga nasimhutan sa iro, uban sa dinung-ag nga saging og kan-on.
Daling gibuksan pag-usab alang sa mga motorista ang gisirang dalan human ang maong pagresponde. (Beth Ruiz)
