BUTUAN CITY – Namahayag si Engr. Pedrito Capilitan usa sa mga aplikante kaniadto pagka- General Manager sa Agusan del Norte Electric Cooperative, Inc. (ANECO) nga tali nila ni Engr. Darwin Daymiel kinsa mao ang kasamtangang General Manager sa ANECO, siya lang ang nakapasar ug nahatagan sa National Electrification Administration kon NEA Board of Administrators og endorsement letter nga mahimong mu-ingkod sa pwesto isip bag-ong magdumala sa maong electric cooperative.
Sa pakighinabi sa Bombo Radyo Butuan, gipadayag ni Engr. Capilitan nga duha lang sila ni Engr Daymiel ang gi-endorso nga pilian alang sa maong pwesto sa ANECO ug gipamugos nga human sa mga proseso, EQ ug IQ exams ingon man sa final interviews nga ilang gi-agian adtong 2018, siya lang ang nakapasar sa mga gikinahanglan ug standards nga gipangita sa NEA nga mukupot pagka-General Manager human nakakuha og minimum rating.
Sigon ni Engr. Capilitan aduna siyay mga basehan ug pagpamatuod nga ang iyang gipang-yawit dili tumo-tumo ug anaa pa sa iyang mga kamot ang maong mga dokumento nga siya ang lehitimong nakapasar ug aprobado ug dili si Engr.Daymiel alang sa maong pwesto sa ANECO .
Dugang ni Engr. Capilitan, taliwa nga aduna nay resulta kaniadto sa selection process alang sa maong pwesto nga gipakanaog sa NEA Board of Administrator apan gi-defy kini pag-abot sa Board of Directors sa ANECO butang nga gipalagan niini tungod kay klarong wala panumbalinga ang nasudnong mando gikan sa NEA.
Gipadayag usab niini nga taliwa nga adunay manok ang board of directors sa usa ka electric cooperative nga gusto nilang mu-ingkod sa usa ka partikular nga pwesto, apan muagi gihapon kini sa NEA board of administrator ug sutaon sa mga niini kung aprobado ba kini alang sa pwesto.
Midistansya na lang usab pagpagawas og pamahayag si Engr. Capilitan dihang gipangutana kung illegal ba ang pag-instular sa board of directors sa ANECO kang Engr. Daymile isip General manager dungan sa pagpadayag nga gitugyan na niya ang maong hisgutanan sa NEA.
Nagpasaka na usab kini og complaint letter sa opisina ni Pangulong Rodrigo Duterte alang sa maong hisgutanan.
