BUTUAN CITY – Magsang-at og motion for clarifications ang House Prosecution Panel sa Senate Impeachment Court kabahin sa desisyon nila pag-remand kon pagbalik ngadto sa House of Representatives sa articles of impeachment batok kang Vice President Sara Duterte.
Sumala ni Rep. Gerville Luistro, dili pa nila dawaton ang mga artikulo sa impeachment tungod kay gusto nila maklaro ang tulo ka isyung gi-raise sa impeachment court.
Giklaro niini nga ang ilang aksyon, wala magpasabot nga ilang gisupak ang kamanduan sa korte tungod kay gusto lang usab nilang sutaon ang gustong ipasabot sa mga senator-judges kalabot sa gipangayo kanilang sertipikasyon kung ila bang nasunod ang mga rekisitos sa pagduso sa impeachment complaint, ug lain pang duha.
Bisan pa, gidayeg nila ang pag-isyu og summon kang Vice President Sara Duterte kansa nagpakita nga buhi pa ang impeachment trial. Nagpakita usab og kalibog ang panel sa desisyon sa Senado ug sigon ni Manila Rep. Joel Chua, ang pagbalik as impeachment court kanila sa mga artikulo sa impeachment, supak matud pa sa Konstitusyon.
Gipasabot usab ni House Prosecution Panel Chairman ug minority leader Marcelino Libanan nga ang Kamara ug Senado, usa ka co-equal body, apan higayong aduna’y impeachment trial, ang Kamara ang magsilbing house prosecution panel samtang ang senado maoy impeachment court.
Gi-emphasize usab ni Antipolo Rep. Romeo Acop nga girespeto nila ang desisyon sa Senate Impeachment Court ug mosunod sila sa mga mando niini.
Gisiguro usab ni San Juan City Representative Isabelle Zamora nga buhaton nila ang ilang trabaho subay sa balaod, ug magpadayon sila paghulat sa sunod nga lakang nga himuon sa impeachment court.
