BUTUAN CITY – Unang nakighimamat si Pangulong Ferdinand “Bongbong” Marcos Jr. sa Filipino community sa iyang pag-abot sa Cambodia kagahapon, alang sa tulo ka adlaw nga state visit nga mulungtad hangtud sa Septembre 9, 2025, isip pagsanong sa imbitasyon ni King Norodom Sihamoni.
Ang unang state visit sa presidente sa Pilipinas ngadto sa Cambodia, sulod sa dul-an siyam ka mga tuig, gila-umang magpalig-on sa bilateral ties sa duha ka nasud ilabina nga target ni Pangulong Bongbong Marcos angpagpalawom sa kooperasyon nila sa depensa ug siguridad, pamatigayon, agrikultura, higher education, ug heritage preservation.
Sa iyang pag-atubang sa Filipino Community, gipadayag niining samtang nangandam ang Pilipinas pag-chair sa Association of Southeast Asian Nations kon ASEAN sunod tuig 2026, ang pagbisita niya sa maong nasud nagtimaan sa commitment sa Pilipinas ngadto sa ASEAN centrality ug regional unity.
Gila-uman usab ang pirmahang mga kasabutan aron mapakusgan pa ang kolaborasyon batuk sa human trafficking ug ubang mga transnational crimes.
Gipasigarbo pa niini ang una niyang pagbisita sa maong nasud niadtong tuig 2022 apan lahi karon nga usa na ka state visit. Apil sa iyang himuon karong adlawa ang roundtable discussions tali sa mga Filipino ug Cambodian business leaders aron pakusgan pa ang pamatigayon ilabina sa natad sa food, beverages, pharmaceuticals ug sa Filipino franchise businesses.
Apil sa iya matud pang siguruhon, ang kaayuhan sa mga trabahanteng Pilipino nga atua sa maong nasud.
