BUTUAN CITY – Ginegar ni Armed Forces of the Philippines (AFP) Chief of Staff General Romeo Brawner Jr. nga duna’y aktibong panawagan nga bakwion sa militar ang ilang suporta kang Pangulong Ferdinand Marcos Jr.
Hinuon aminado ang heneral nga dunay pipila ka mga retiradong opisyal sa Armadong Kusog sa nasud nga miduol kaniya kaniadto ug naningkamot nga kombinsihon ang mga batan-ong opisyal ug commanders nga mu-apil sa posibleng military intervention, sama sa kudeta o pagtukod og military junta, aron i-reset ang tibuok Philippine society o tangtangon ang suporta sa Pangulo.
Nahitabo matud pa kini sa wala pa ang dakong anti-corruption protest niadtong Setyembre 21, kansa bunga sa mga isyu sa anomalya sa mga flood control projects. Apan, sumala ni Gen. Brawner, wala’y aktwal nga kalihokan nga nahitabo atol sa protesta. Isip Chief of Staff, kompyansa siya nga walay miyembro sa AFP ang motuman sa panawagan sa ubang sektor o indibidwal nga manghilabot sa politika, tungod sa propesyunalismo sa kasundalohan.
Taliwala pa man adunay mga panawagan atol sa rally, ilang ipasabot kini sa Pangulo isip Commander-in-Chief, ug wala kini nakaapekto sa pagsalig sa Pangulo sa AFP.
Kahinumduman nga una nang gisalikway sa Department of National Defense (DND) ang mga ispekulasyon kabahin sa posibleng plano nga kudeta batok sa administrasyon ni Marcos. Gibarugan ni Defense Secretary Gilbert Teodoro nga walay miyembro sa AFP nga nagplano niini.
