BUTUAN CITY – Gipahibalo ni Department of Public Works and Highways (DPWH) Secretary Vince Dizon nga nakadiskubre sila og 421 ka mga ghost flood control projects sa nagkalain-laing bahin sa Pilipinas.
Kini nga mga proyekto gi-report nga nahuman na ug fully paid bisan og wala pa nagsugod ang konstruksyon.
Apil niini ang Davao Occidental, nadiskubre ang P96.5 milyon nga proyekto sa Culaman Bridge, Jose Abad Santos kansa gi-award niadto pang tuig 2022 ngadto sa St. Timothy Construction Corp. kondiin fully paid na kini sa DPWH bisan wala pa nagsugod ang trabaho hangtod niadtong Setyembre ning tuiga.
Mismong ang lokal nga komunidad mismo ang nag-report sa anomalya rason nga kini gi-inspeksyon ni Dizon ka-uban si Baguio City Mayor Benjamin Magalong.
Tungod niini, nagpagawas gilayon og show-cause ug suspension orders ngadto sa mga opisyal sa DPWH Davao Occidental District Engineering Office samtang gi-andam na usab ang criminal charges nga ipasaka batok sa contractor ug sa mga DPWH personnel nga nalambigit sa anomalya.
Gitan-aw usab sa Independent Commission for Infrastructure (ICI) ang posibilidad nga adunay kalambigitan ang mga politiko ug government auditors sa maong mga proyekto ug kini nga discovery, nagpakita sa lawom nga problema sa sistema sa procurement ug implementasyon sa mga infrastructure projects sa nasud.
