BUTUAN CITY – Tumang kalipay ang gibati ni Judy Chin Amante – nakabuwag nga asawa sa napilding si kanhi Agusan del Norte 2nd District Rep. Erlpe John Amante, nga iyang napildi ang kasamtangang mayor og karelasyon sa iyang bana nga si Katrina Marie Mortola.
Sa eksklusibong pakighinabi sa Bombo Radyo Butuan, malipayon kining nagpasalamat sa tanang Cabadbaranons nga mibotar kaniya. Dili matukib ang kalipay nga ilang gibati tungod kay landslide victory ang na-angkon sa ilang partidong PDP-Laban rason nga 12-0 ang ilang nasakmit.
Kini human nga midaog usab ang iyang running-mate nga si re-elected Vice Mayor Ray Jamboy og ang ilang line-up pagka-konsehal nga gilangkuban nila Inez Amante, Jamjam Corvera, Popoy Famador; Oliver Bulang; Joan Monding; Abner Cagaanan; Celson Sanchez; Judith Cueno, Lovejoy Quiambao og Alan Asio.
Sigon sa bag-ong napiling mayor, dili nila pakyason ang ilang katawhan paghatag sa serbisyong ilang gisaad ngadto kanila.
