BUTUAN CITY – Usa ka testigo ang mibulgar sa baligya-anay sa Good Conduct Time Allowance kon GCTA law sulod sa New Bilibid Prison kon NBP.
Sa pagdungog sa Senate Blue Ribbon Committee kagabii, gibutyag ni Yolanda Camelon nga giduol siya ni Correctional Senior Inps. Maribel Bansil og gihanyagang pagawason ang iyang bana bugti sa 50-mil pesos.
Human niini, gipa-ila ila matud pa siya kang Staff Sergeant Ramoncito ‘Chito’ Roque sa Documents Processing Section sa Bureau of Corrections kon BuCor.
Nakumpleto matud pa niya og bayad ang 50-mil pesos alang sa pagbuhi sa iyang mister niadtong Marso apan nasibog kini sa Oktubre hinungdan nga iya kining gisulayan og bawi apan pakyas siya tungod kay nagtinudlu-ay na ang duha.
Nagtuo si Camelon nga daghan pang kabanay sa mga piniriso ang gihanyagan sa GCTA for sale apan mahadlok lang musulti.
Samtang gipanghimakak kini ni Chito Roque dungan sa pagbutyag nga tinuod nga gitunulan siya og envelop og gipugos pagpadawat kaniya apan iya matud pa kining gibalik sa kahadlok nga makadaut kini kaniya.
