BUTUAN CITY – Gilihok na karon sa konseho sa Brgy. Alegria, Surigao City ang resolusyon aron himuong protected area ug bat sanctuary ang portion sa ilang barangay nga gihimo karong puy-anan sa duha ka klase sa gatusang mga flying fox kon kwaknit.
Nasayrang ang maong mga kwaknit anaa nagpuyo sa residential area atbang lamang sa ilang barangay hall rason nga nahimo na kini karong tourist attraction rason nga kinahanglang maprotektahan ang ilang populasyon.
Sa eksklusibong pakighinabi sa Bombo Radyo Butuan, gipadayag ni Surigao City Community Environment and Natural Resource Officer kon CENRO Ruel Efren nga sa duha ka mga klase sa kwaknit nga anaa sa maang lugar, ang mga large flying foxes mao karon ang endangered na rason nga gikonsidera karon sa ilang ahensya nga himuon kining priority species for conservation sama sa marine life nga dugong.
Makita matud pa ang maong klase sa mga kwaknit sa ubang mga lugar sa nasud apan sa Surigao del Norte, didto lang kini makita sa Brgy. Alegria sa Surigao City.
Nakitang hinungdan ni CENRO Efren nga napili sa maong mga kwaknit ang pagpuyo sa maong island barangay tungod kay gihatagan sila og importansya sa katawhan ug dili kaayo madisturbo ang ilang pamuyo.
Gawas pa posibleng anaa usab sa maong lugar ang tuburan sa ilang pagkaon nga dili na nila kinahanglan pang mudayo.
