BUTUAN CITY – Gipadayag ni House Committee on Appropriations Chairman Rep. Mikaela Suansing nga ang 2026 general appropriations bill, responsive sa panginahanglan sa katawhan nga maoy gipasigarbo sa 20th Congress.
Giklaro ni Suansing nga ang P255 billion na pondo alang sa flood control projects, ire-allocate sa 3 ka importanteng sektor nga gitumbok ni Pangulong Ferdinand Marcos Jr. nga mao ang edukasyon, panglawas ug agrikultura.
Gipaniguro usab niini nga wala na’y mga proyekto sa flood control, tulay ug uban pa nga kuhaon gikan sa unprogrammed appropriations dungan sa pagklaro nga gitangtang na sa iyang komite uban sa pakigsabot sa Department of Budget and Management (DBM), ang ₱35 bilyon nga infrastructure projects gikan sa unprogrammed appropriations aron malikayan ang misuse sa lump-sum funds.
Hinuon gibutyag niini nga importante ang mga unprogrammed appropriations, rason nga magpabilin kini aron pondohan ang mga foreign-assisted infrastructure projects nga dili apil sa programmed funds tungod sa deadline constraints.
Apan ubos sa bag-ong patakaran, sugod sa tuig 2026, dili na mahimong gamiton ang unprogrammed fund alang sa mga local infrastructure projects sama sa flood control kansa kinahanglan nang naka-itemize sa budget sa mga ahensya sa gobyerno.
Gidugang pa niini nga ang unprogrammed fund kabahin sa budget nga mahimo lang gamiton kung duna’y excess revenue collection o foreign grants/loans alang sa sunod tuig.
