BUTUAN CITY – Mi-abot sa 12 ka mga pulis, retirado ug aktibo na sa serbisyo, ang gilambigit ni Julie Patidongan alyas Totoy sa pagkahanaw sa 108 ka mga sabungero human ang iyang pagduso sa iyang complaint affidavit kaganina sa National Police Commission kon NAPOLCOM.
Gitumbok ni alyas Totoy nga nalambigit sa maong kremin sila retired LGen Jonel Estomo, Major Oropa, Col. Celso Salazar, Col. Malinao nga nahimong hepe sa Criminal Investigation and Detection Group kon CIDG-Region 4-A ug uban pa.
Emosyunal pang gipadayag ni alyas Totoy nga ang naghatag kaniya og ka-isog pagbulgar sa dautang binuhatan sa maong mga pulis uban sa negosyanteng si Charlie ‘Atong’ Ang, tungod sa bahad nga patyon siya ug ang iyang pamilya.
Samtang gibutuag usab ni NAPOLCOM Vice Chairman Ralph Calinisan, nga dako kini nga development sa maong kaso tungod kay mu-aginod naman unya ang imbestigasyon sa mga tawong nalambigit niini.
Sigon ni Calinisan, apil sa ilang himuon ang pormal nga pagpasaka og kaso batuk sa mga akusadong police officers, pagkumpara sa mga alegasyon ni Patidongan ug pagtimbang-timbang sa tanang ebidensya sulod sa 60 ka ma adlaw.
Dugang ni Calinisan, ilang sundon ang due process sa pagsusi sa mga pulis nga gilambigit sa maong kremin ug higayong mapamatud-ang inosente ang gilambigit nga mga pulis, i-abswelto sila apan kung masutang guilty, kinahanglan silang manubag sa salaud nga ilang nahimo pinaagi sa pagsuspenso o kaha pagkatangtang sa serbisyo ingon man pag-atubang og patong-patong nga kasong kriminal.
