BUTUAN CITY – Gidawat ni kanhi Supreme Court Senior Associate Justice Antonio Carpio ang hagit ni Senador Rodante Marcoleta alang sa usa ka public debate mahitungod sa West Philippine Sea (WPS) aron maklaro kung apil ba niini ang mga maritime features sa Kalayaan Island Group (KIG).
Kini human gipadayag ni Marcoleta nga posible matud pang isurender sa Pilipinas ang pipila ka bahin sa KIG tungod kay dili matud pa kini sakop sa Exclusive Economic Zone (EEZ) sa nasod kansa hugot nga gisupak ni Philippine Coast Guard spokesperson Commodore Jay Tarriela.
Dinhi usab niya gisugyot kang Marcoleta nga mokuyog sa usa ka Maritime Domain Awareness flight aron makita ang tinuod nga kahimtangan sa lugar.
Gawas kang Carpio, gihangyo usab ni Marcoleta og friendly debate si Tarriela ug Prof. Jay Batongbacal sa UP Institute for Maritime Affairs and Law of the Sea.
Si Carpio nailhan isip lig-on nga tigpanalipod sa katungod sa Pilipinas sa WPS, ilabina human sa 2016 arbitral ruling nga nagpawala’ng-bisa’y bili sa nine-dash line claim sa China.
Naglaum ang pipila ka mga observers nga ang maong debate makahatag og kahayag sa publiko bahin sa legal nga basihan sa claim sa Pilipinas sa WPS ug sa importansya sa pagpanalipod sa soberanya sa nasud.
