BUTUAN CITY – Gilugwayan sa Court of Appeals ang giisyung freeze order sa bank accounts, mga kabtangan, ug uban pang mga assets ni Kingdom of Jesus Christ leader Pastor Apollo Quiboloy. Kini ang gikumperma sa legal counsel sa Kingdom of Jesus Christ kon KOJC nga si Atty. Dinah Tolentino-Fuentes atul sa press conference sa Davao city kagahapong adlawa.
Sumala niini nga gilugwayan pa ang freeze order sa ilang lider taman sa Pebrero 3 sa sunod nga tuig. Sa kasamtangan, wala pa nila nadawat ang kopiya sa nasangpit nga extended freeze order. Kahinumduman nga una nang nag isyu ang Court of Appeals og 20 ka adlaw nga freeze order sa mga kabtangan ni Quiboloy lakip na sa KOJC ug Swara Sug Media Corp., kansa maoy nago-operate sa Sonshine Media Network Internationalm (SMNI), ang media arm sa KOJC.
Sakop usab sa freeze order ang 10 ka mga bank accounts sa maong Pastor, pito ka mga real properties, lima ka motor vehicles ug usa ka aircraft nga gipanag-iyahan sa KOJC, lakip na ang 47 ka mga lain pang bank accounts, 16 ka mga real properties ug 16 ka mga motor vehicles sa KOJC.
Gihangyo matud pa ang maong freeze order sa Anti-Money Laundering Council kon AMLC kansa giaprunahan usab sa CA human makita ang responsableng basehan nga may kalambigitan matud pa ang mga bank accounts ni Quiboloy sa mga ilegal nga aktibidad ug krimen sama sa human trafficking , sexual ug child abuse, ug uban pa.
