BUTUAN CITY – Giklaro ni kanhi Senador Aquilino ‘Nene’ Pimentel Jr. sa eksklusibong pakighinabi sa Bombo Radyo Butuan nga ang kamahinungdanon sa ika-33 ka tuig nga paghandom karon sa EDSA People Power revolution mao ang paghatag og importansya sa atong na-angkon karong kagawasan sa pagpadayag.
Kini tungod kay niadtong kapin sa 20 ka tuig nga pagpatuman sa martial law ilalom kang kanhi Pangulong Ferdinand Edralin Marcos, wala’y katungod ang si bisan kinsa nga mureklamo ilabina batuk sa serbisyo sa gobyerno.
Sa eksklusibong pakighinabi sa Bombo Radyo Butuan, gipadayag sa kanhi senador nga angayang masabtan sa tanan ilabina sa mga batan-on ang diwa sa EDSA.
Kini mao ang kamahinungdanon dili lang sa kinabuhi kondili apil na ang mga katungod sa iyang pagpakabuhi ning kalibutana sa kagawasan og demokrasya ilabina ang pagpa-abot ngadto sa gobyerno sa mga gusto nilang himuon sa ingon dili mahimong ulipon sa gobyerno.
Gibalik-lantaw pa sa senador ang upat ka higayon niyang pagkabilanggo panahon sa martial law taliwa sa kawala’y igong basehan tungod kay inimbento lang ang mga akusasyong gipasangil batuk kaniya.
Hinuon mapasalamaton siya tungod kay wala matud pa siya makasinati og mga pagpasakit sama sa ubang mga gibilanggo sa maong panahon. (Beth Ruiz)
