BUTUAN CITY – Gihandom sa mga Dabawenyos ang usa ka tuig nga matud pa, pagkuha sa nasudnong kagamhanan kang kanhi Pangulong Rodrigo Duterte padulong ngadto sa International Criminal Court sa The Hague, Netherlands.
Sigon ni Engr Dioric Gavino, secretary general sa Sara All Movement, gihimo kaganina ang misa nga gusundan sa panagtapok sa mga supporters sa may San Pedro ug pagkagabii gihimo ang candle-lighting ceremony.
Dinhi sa Caraga Region ilabina sa Butuan City, misa lang ang gihimo pahinungod ngadto sa kanhi pangulo. Giklaro usab ni Engr Gavino nga wala na’y gihimong mga rali isip pagsunod sa hangyo ni Vice President Sara Duterte aron dili pa matud pa mahasol ang mga tawo ilabina nga dawat na usab sa ilang pamilya ang nadangatan sa iyang amahan.
Kung duna matud pa’y mga lugar diin nagtapok ang mga tawo o kaha nagrali, ila na matud pa kining inisyatibo tungod kay wala’y laing hangyo ang mga Duterte kondili mao na lang ang paghalad og mga pag-ampo alang sa ilang amahan ilabina ang tinguha nilang maka-uli pa kining buhi dinhi sa nasud.
Giklaro pa ni Gavino nga pabilin pang positibo ang mga Duterte supporters sa ilang gihimong signature campaign nga gipadala ngadto Korte Suprema ug ipadala usab ngadto sa ICC sa pangindahay nga mamilagruhan ug tugutang makagawas sa international tribunal ang kanhi pangulo ug madala pagbalik sa Davao City.
