BUTUAN CITY – Aminado si Davao City Vice Mayor-elect Sebastian ‘Baste’ Duterte nga na-apektuhan siya sa pagniwang sa iyang amahang si kanhi Pangulong Rodrigo Duterte samtang anaa sa detention facility sa International Criminal Court sa The Hague, Netherlands.
Kini tungod sa kawala’y makaon niini nga mga pagkaong Pinoy sama sa buwad nga maoy makapagana sa iyang kada-adlaw nga pagkaon.
Samtang sa dagan karon sa kaso sa iyang amahan, nagtuo si Baste nga makagawas ra kini tungod kay wala matud pa’y lig-ong basehan aron kini kasuhan gawas nga ilegal pa ang pag-aresto niini.
Sa pagkakaron, wala pa usa’y final decision kung sa unsang paagi makapanumpa ang iyang amahan pagka-mayor sa ilang siyudad ug usa kini karon sa ilang gipangitaan og pamaagi.
Samtang mapasalamaton usab si Vice President Sara Duterte nga mitugot ang International Criminal Court kon ICC sa ilang hangyo nga dugangan ang adlaw sa ilang pagbisita sa iyang amahan kada-semana nga gihimo na karong matag-adlaw’ng Martes, Miyerkules ug Biernes.
Ning adlawa, ilang nahurot ang usa ka oras ug tunga nga pagbisita nila sa iyang manghod nga si Baste ngadto sa ilang amahan nga sundan na usab karong Biernes. Na-update usab nila ang ilang amahan sa kaso niini, base na usab sa gitugot lang sa ICC nga ilang ihatag ingon man sa kalihukan nilang mga membro sa pamilya.
