BUTUAN CITY- Gi-adopt na sa Local Government Unit kon LGU-Cabadbaran City ang Memorandum Circular 114 sa Malacañang kansa nagpatuman sa Four-Day Work Week.
Sumala ni Roselyn Exaure, tigpamaba sa LGU-Cabadbaran, nga gi-isyu na ni Cabadbaran City Mayor Judy Chin Amante ang usa ka Executive Order ug kagahapon mismo gi-implementar na ang maong polisiya human sa emergency meeting nga gipatawag sa City Administrator uban sa mga Department Head ug Division Chief.
Pagpasabot pa ni Exaure, ang mga empleyado sa LGU-Cabadbran mosulod gikan alas 7 sa buntag hangtod na alas 6 sa hapon, sugod Lunes hangtod Huwebes.
Apan gi-identify usab sa maong meeting ang mga essential offices sama sa City Disaster Risk Reduction and Management Office kon CDRRMO, City Health Office, City Security and Traffic Management Task Force kon CSTMTF, City Environment and Natural Resources Office kon CENRO, mga garbage collector ug mga street sweeper diin kinahanglang nga mopadayon sa lima ka adlaw nga duty aron masiguro nga magpabiling limpyo ug hapsay ang syudad kansa nailhan nga usa sa pinakalimpyo sa rehiyon.
Dugang pa sa tigpamaba, nga nag-sugod na kagahapon ang implementasyon sa Four-Day Work Week subay sa Memorandum Circular 114 sa Malacañang, apan gi-emphasize usab sa City Administrator ang Energy Reservation aron malikayan ang dako nga gasto sa krudo ug lana nga posibleng mosaka pa og kapin P20.
Matud pa niini, nga lakip sa mga authority measures nga gipatuman mao ang “Carpool” policy, diin kung adunay official nga tuyo sa Butuan City, isahon na ang tanang tuyo aron nga isa ra ka saynana sa opisina modagan.
Gibutyag ni Exaure, nga ang maong lakang gilaraw aron makunhuran ang gasto sa pondo sa syudad ug masiguro nga epektibo ang paggamit sa resources sa panahon sa pagpatuman sa bag-ong work arrangement ingon man ang epekto sa dakong pagsaka sa produktong petrolyo.
