BUTUAN CITY – Giklaro ni Larry Collin – founder og chief executive officer kon CEO sa Forex Trading Philippines – usa ka trading center company nga nakabase sa Makati City, nga ang ilang kompanya dili usa ka investment company rason nga dili nila kinahanglan ang recruitment.
Kini ang giklaro sa opisyal subay sa mikaylap karon nga investment schemes nga Forex nga nagapang-recruit og mga membro og nangayo og investment bugti sa madawat nilang interest nga 500-porsiento kada-semana.
Sa eksklusibong pakighinabi sa Bombo Radyo Butuan, gibutyag ni Collin nga ang Forex Trading Philippines usa lang ka training company kansa wala nagapangdawat og bisan unsang bayad og labaw na nga wala naghanyag og mga investment products.
Giklaro usab niini nga dili sila konektado sa mga Forex companies nga ania sa dakbayan sa Butuan og uban pang bahin sa Caraga Region apil na sa ubang mga probinsya sa Mindanao.
Iyang gidugang nga ang Forex Trading Philippines usa sa mga foreign exchange educational resources sa nasud nga naglusad lang og mga libreng trading trainings, seminars og workshops sa tanang bahin sa nasud kondiin ilang tudluan ang mga indibidwal nga gustong masayod kung unsa ang Forex trading.
