BUTUAN CITY – Pursigido ang pamilya sa usa ka forest ranger nga kasuhan ang upat ka mga responsable sa pagpusil-patay niini kagahapong adlawa.
Naila ang biktimang si Marianito Rufano, residente sa Brgy. Bayugan 3, Rosario, Agusan del Sur ug nadestino sa Community Environment and Natural Resources Office kon CENRO-Bunawan.
Sa eksklusibong pakighinabi sa Bombo Radyo Butuan, gipadayag ni CENRO-Bunawan Jerome Albia, nahitabo kini pasado alas-2:30 kagahapon sa hapon dihang pa-uli na unta gikan sa duha ka adlaw’ng operasyon.
Sa siyam ka mga naglusad og operasyon, nag-una matud pa og lakaw ang biktima kondiin gipara kini sa wala pa matinong ihap sa mga armadong lalaki ug dinhi na giluba ug gipusil dayong sibat padulong sa wala pa matinong direksyon.
Apan tungod kay nakit-an ug na-ilhan sila sa mga nakasaksing ka-ubanan ni Rufano, mitahan gilayon sa pinakaduol nga detachment ang usa samtang sa police station usab ang laing usa.
Narekober sa crime scene ang usa ka kalibre 45 nga pistola uban sa lima ka mga basiyo niini ug usa ka bolo.
Dugang ni Albia, misurender ang duha human nga nasamdan ang lain pang duha nila ka mga ka-ubanan kinsa na-igo usab sa pagpusil ug balos sa biktima adiser kini nakutluan sa iyang kinabuhi.
Suportahan sa CENRO-Bunawan ang na-ilong pamilya sa biktima diha sa aspetong legal ilabina nga nahitabo ang kremin atol sa tour of duty niini.
