BUTUAN CITY – Kontrolado na kon na-contain na sa mga bombero ang nasunog nga 63-ektaryang peatlands kon peat swamp forest sa Brgy. Bayugan 3 lungsod sa Rosario, Agusan del Sur nga nagsugod niadto pang Agusto 25 ning tuiga.
Sigon ni Eric Gallego – information officer sa DENR-Caraga, wala gilayon na-aksyunan sa mga bombero ang maong sunog tungod sa kahumok sa agi-an nilang mga lata nang kahoy nga natigom sa taas nga panahon sa basa nga bahin sa maong lugar.
Sa eksklusibong pakighinabi sa Bombo Radyo Butuan, gipadayag sa opisyal nga ilang nakumpirma ang lapad nga kadaut nga hatud sa maong forest fire base na usab sa kuhang litrato sa gipalupad nga drone sa mga CENRO officials sa kasikbit nga lungsod sa Bunawan.
Padayon pa karong gibantayan ang maong lugar nga nasunog aron masigurong wala na’y baga sa mismong peat swamps nga abunda sa lata nga mga kahoy. Kini dungan na usab sa nagpadayon nilang imbestigasyon aron matumbok na ang indibidwal nga posibleng nagdagkot og kalayo resulta sa maong insidente.
